نصيبها مجاش – هلا رشدي

نصيبها مجاش وزعلانة
ورايحه وجايه سرحانه
لان فلانة وفلانة
خلاص ارتبطوا قبليها
صحيح مش حاسه بالغيرة
لكن شايفة انها كبيرة
وسيرة السن دي سيرة
بقت فعلا بتئذيها

يحاولوا يفرحوها ساعات
باي حاجات وما بتفرحش
بقت بتخاف من المرايات
لا تلمح عيب ما يتصلحش

وعايشة ما بين ملل وروتين
ودايما حاسة بالاحباط
تشوف مشهد في فيلم حزين
فتتحجج وهات يا عياط

ساعات بتقول بصوت عالي
اكيد الدنيا شايلالي
مفاجأة ما جاتش علي بالي
ومش حتسيبني قلقانة

ويوم ما حبيبي حيجيلي
حاكون اسعد بنات جيلي
وهحكيله ويحكيلي
عن الحب اللي جوانا

مسير الحلم ف المواعيد
حييجي اكيد ويبقي بجد
يقرب ربنا اللي بعيد
دة ما بيرضاش يزعل حد

تملي بنكره التاخير
ونستعجل علي الاحلام
ونكتشف ان كل الخير
معاده الصح كان قدام