كلمات اغنية راح العشيق عبدالكريم الحربي
راح العشيق ولا بقى غير التوجد والشقى
وانا على درب اللقا رغم الظروف القاسيات
رغم المواجع والاسى رغم القطيعة والقسى
لي قلب عاشق ما نسى يسترجع احلى الذكريات
اتخيله وابكى قهر روحي لضحكاته مهر
بدلت نومي بالسهر لاجله غدا مخي شتات
انظرله بعين الرضى والقلب مؤمن بالقضى
كني على جمر الغضا اهات تدفعني لاهات
نبضات عشقي واضحة والسر دمعي فاضحة
حتى الخوافي ناضحة على مسار الامنيات
وشلون تتركني افا بالذات في فصل الشتا
احتاج من حضنك دفا اوراق عمري ذابلات
سعيتله واصغيتله طول الزمن وضحيتله
من مرقدي فزيتله لكن الرجاء في الحي مات
ما انساه لو طال الهجر هو ليل قلبي والفجر
لو طاحت اوراق الشجر ما غاب في كل الجهات
الغيث حاير في السما مشاعري ماتت ظما
قولوله العاشق عمى رغم العيون المبصرات
مادام لي دافع صدوق اتجيبه الذكرى وافوق
العشق له رونق وذوق ماهو كذب ومهاترات
كل المشاعر دافية يوم الليالي صافية
نظرات عينه كافيه الناعسات الذابلات
واليوم مدري ويش اقول كل المشاعر في ذهول
تعبت ادور لي حلول يا الله يا رب الثبات