النفسية بعافية
عارفين مين مرتاح طول عمره
اللي مسلم لله امره
من جواه راضي ومتطمن
عايش زي ما ربنا امره
النفسية بعافية شوية
محتاج مصحف ومصلية
واقعد جوة الاوضة لوحدي
وارمى ورايا هموم الدنيا
اجمع قلبي واعيش مع اية
تشفي الم موجود جوايا
واسجد واطول في سجودي
تسجد كل مشاعري معايا
ومادام الارزاق مكتوبة
والاعمال مسالة محسوبة
ضعف يقين خلانا نشوف
في الدنيا حقايق مقلوبة
مش هامه بكرا ولا امبارح
مع كل الايام متصالح
بس بيسعى وهو مصدق
انه في كل الاحوال رابح
فضي في قلبك اي مساحة
لو مترين خليهم واحة
لما تجيب اخرك م الدنيا
فيها تلاقي سكينة وراحة
واسرق نفسي من الايام
وانسى صراع وضجيج والام
واخطف ساعة اقرب فيها
من ربنا وانا هبقا تمام
وانا في الصلا بسجد وبكبر
حجم الدنيا ف عيني بيصغر
لما افتكر انها مش دايما
واننا فيها ضيوف مش اكتر