كلمات اغنية قتل عمد علي غزلان و شيماء المغربي

كلمات : الشاعر تامر عبد الرحمن & مصطفى حسين ( شارك بالكوبليه الاول و الثالث راب )

الحان : الملحن احمد راجح

توزيع موسيقي : الموزع تيام طارق

هندسة صوتية و ميكساج و ماسترينغ : مهندس صوت مهاب اسامة

جيتار : محمد مغربي

كمان : مصطفى العطار

تسجيل : Gleem Records

تاريخ الطرح الرسمي : 07‏/03‏/2019

جوة قلبك ولا قلبي كلام محدش يسمعه ربنا وحده اللي عالم اللي فيه و بيوجعه

ماتعايرش ف حد ناقصه قوي قلبه و شجه و اسنده خليك ف ضهره و اوعى حد يوقعه

ربنا لما خلقني و جوة مني حاجة ناقصة كان بيبعتلك رسالة كان بيزرع فيا حكمة

و الرسالة انك تكمل اللي ناقص عندي عندك لو وقعت تشيلني رجلك لو ضعفت تشيلني كلمة

كلمتك ممكن تقرب او تطمن او تشيل او تخلي الدنيا اصعب حملها ع الروح التقيل

اي حد حب يجرح حد جه زمان عليه و ان دي مش قوة لا دة ضعف و بيداريه

هو حس بانه ناقص قام يطلع نقصه فيه و انه مش فاهم بجهله و انها بتترد ليه

حاجة متقللش مني لو رفيع او تخين بردو مش هيعلي منك لو تقولي كلام مهين

الهزار مش ضحكة طالعة تجلد اللي مداري عيبه و الجدع مش عيبه ابدا شكله ايه ولا ابن مين

ربنا من لطفه بيا جابني بس برجل واحدة كنت بمشي بكرسي دايما يا ف ايديا العكازات

كانوا دايما يندهولي يا اللي عاجزة و ياللي سادة انتي شكلك ليه يخوف يا اللي مش شكل البنات

كنت دايما عندي حالة من التوكل و التعاسة اني دايما كنت شايف السواد تحت العينين

كل واحد كان يشوفني يبقى بيقولها و بغلاسة اني واحد مش طبيعي و اني شكل المدمنين

الباروكة ف مرة وقعت غصب عني في ميكروباص اللي كانوا جمب مني خافوا مني و اخدوا جمب

كل واحد م اللي شافوا نظرته كانت رصاص ماتوا م الضحك و سابوني و بعد كانسر عندي قلب

حط نفسك يوم مكاني و شوف بقى هتحس ايه لما حد ف يوم يهزر ع اللي مالكش ذنب فيه

يبقى بيزود همومك يبقى بيحطم كيانك و اللي متخبي في شكلك هو هيشاور عليك

اوعى تكسر حد حاسس انه عايش في الوجع خلي قلبك يبقى طيب و ارحمه خليك جدع

خلي بالك اوعى تغلط يوم بكلمة و تتسمع و احمي حزن ف قلب واحد كان بايدك تمنعه

اختلافنا مش اساسي يبقى عيب قدام عينيك اختلافنا وضع عادي البشر مش زي بعض

يعني لما تقول يا سودة تفتكر ههتم بيك كلنا من نسل واحد كلنا شايلانا ارض

عندي عاهة في وشي لما انا اتخبط في لوح قزاز خدت كام غرزة و لقيتهم علموا فيا لسنين

كانوا كل الناس يقولوا مش هتنفع للجواز هو اهبل مين ياخدها وهي شكل المجرمين

ليه تملي بيجرحوني لما اتهته في الكلام و اني لو عايز اعبر عن حاجات بحتاج لوقت

كل ما انطق كلمة الاقي ضحك هيستيري و زحام و اللي فجأة يقولي يابني عيدها تاني لو سمحت

ليه بتدخل تقرا رايي و انت مش عاجبك كلامي كل واحد حر يكتب اللي شايفه و حس بيه

مستحيل انت بشتيمتك تبقى كسبان اهتمامي و الغلط بيعيب في صاحبه وانت تغلط فيا ليه

كل واحد فينا عايش ناقصه حاجة من السنين ربنا وحده اللي شاله و هو عارف ليه و فين

الورود لو لونها واحد يبقى مالهاش اي قيمة و البشر لو شكل واحد يبقى مين هيحس مين

احنا اسفين لو سمعتوا اي كلمة مش تمام انتوا لازم تلقوا فعلا مننا كل احترام

لو نفكر بس لحظة قبل ما نقول الكلام و الضمير يحكم لسانا الف حرف نرجعه

و النهاية في كل حالة التنمر قتل حاسم قتل عمد لكل واحد اتوجع عمره لسنين

و اللي بيعيب في رسمة يبقى بيعيب في اللي راسم

وانت لما تعيب في شكلي يبقى بتعيب في مين

اكتشفنا وجود اداة منع الاعلانات AdBlocker في متصفحك,
يرجى تعطيل هذه الاداة حتى تتمكن من تصفح الموقع وقراءة المحتوى.