كلمات قصيدة اول غرام عزيز محسن الكناني

يا اول غرام او يا نديم الروح و يا اخر عشگ ساکن ابدلالي
لتتدلع علي يا ولفي كافي ارجوك مثل العيد صرت وناگص اهلالي

وانت اهلال عيدي العايش ابرجواك ومن ابعيد للينتظرك اتلالي
يا اجمل غزل عاشر اوراقي اسنين ابحبك مادريت اشصاير ابحالي

تتدهور اوضاعي وگلبي يحچي اهموم وابشوفك تعاود صحتي يالغالي
عطيتك عشگ بي اتحدى ليلى وقيس ليل انهار ابد مافارگت بالي

رواني ابكاسه صح الوكت هم و ظيم ولابد هالوكت فد يوم يصفالي
واصرخ حتى اسمعك ولله احبك موت واريدنك نصيبي اول وتالي

يا معزوفة عشق تاخذني لام كلثوم ويا حزن ادريس بعدك تعزف امالي
اسكرك بالشفايف بس تعال و شوف يالطولك غصن يتمايل اگبالي

من اشم صدرك حبيبي ليلي صبح ايصير ودخيل الله اعتقد ماموت للتالي
و اذا اسكنك ابعيني تدري اخاف اكثير من نفسك اغار اعليك واشحالي
تعال وعلي سير بسمه فوگ اشفاي حت لو تنگلب یا ولفي كتالي

يابو اخدود اللي تلمع مثل بدر التام و يا هيل اليفوح ابگهوة ادلالي
احلق بالسما لجلك بدون اجناح وادور اعليك بارض اجنوب واشمالي

يل محير القلم من ارد اوصف بيك الك بچیت دمعي العاش باجلالي
صرت حالة زليخا ويوسف انا وياك لا حاچیت حبي ولا تحچالي

اسالنك سؤال و اقسمك بالله مو حور انته من الجنة نزلالي
يا لون الربيع اللي يبشر ابخير تتحقق احلامي وريت تصفالي

وتحط ايدك ابايدي وتطلب اشمتريد وراح انته اتتدلل صدگ ابیالي
اذا هذا طلب اتصل گول اهواك ينتظرك ايميلي ورقم نقالي

معلومات و تفاصيل

كلمات و القاء	عزيز محسن الكناني
اعداد موسيقي	عادل الحويزي
هندسة صوتية	احمد جراحي
ماسترينغ	امين بويه | Amin Pooya – ستوديو فنون الاهواز
انتاج	فنون الاهواز – العراب ميوزك للانتاج
الفيديو كليب	يوتيوب
الطرح	24/03/2020